mohabbat kya baDhi hai wahm baham baDhte jate hain

mohabbat kyā baḌhī hai vahm bāham baḌhte jaate haiñ

ham un ko āzmāte haiñ vo ham ko āzmāte haiñ

na ghaTtī shān-e-māshūqī jo aa jaate ayādat ko

bure vaqtoñ meñ achchhe log aksar kaam aate haiñ

jo ham kahte nahīñ muñh se to ye apnī muravvat hai

churānā dil kā zāhir hai ki vo āñkheñ churāte haiñ

samāñ us bazm kā barsoñ hī guzrā hai nigāhoñ se

kab aise-vaise jalse apnī āñkhoñ meñ samāte haiñ

kahāñ tak imtihāñ kab tak mohabbat āzmāoge

unhīñ bātoñ se dil ahl-e-vafā ke chhūT jaate haiñ

ḳhumār āñkhoñ meñ baaqī hai abhī tak bazm-e-dushman kā

tasadduq us DhiTā.ī ke nazar ham se milāte haiñ

dil ik jins-e-girāñ-māya hai lekin aañkh vāloñ meñ

ye dekheñ husn vaale is kī qīmat kyā lagāte haiñ

kisī ke sar kī aafat ho hamāre sar hī aatī hai

kisī kā dil koī taake magar ham choT khāte haiñ

ga.e vo din ki naame chaak hote the 'hafīz' apne

hasīn ab to mirī tahrīr āñkhoñ se lagāte haiñ

mohabbat kya baDhi hai wahm baham baDhte jate hain

hum un ko aazmate hain wo hum ko aazmate hain

na ghaTti shan-e-mashuqi jo aa jate ayaadat ko

bure waqton mein achchhe log aksar kaam aate hain

jo hum kahte nahin munh se to ye apni murawwat hai

churana dil ka zahir hai ki wo aankhen churaate hain

saman us bazm ka barson hi guzra hai nigahon se

kab aise-waise jalse apni aankhon mein samate hain

kahan tak imtihan kab tak mohabbat aazmaoge

unhin baaton se dil ahl-e-wafa ke chhuT jate hain

KHumar aankhon mein baqi hai abhi tak bazm-e-dushman ka

tasadduq us DhiTai ke nazar hum se milate hain

dil ek jins-e-giran-maya hai lekin aankh walon mein

ye dekhen husn wale is ki qimat kya lagate hain

kisi ke sar ki aafat ho hamare sar hi aati hai

kisi ka dil koi take magar hum choT khate hain

gae wo din ki name chaak hote the 'hafiz' apne

hasin ab to meri tahrir aankhon se lagate hain