mohabbat mein kabhi taskin-e-dil pai nahin jati

mohabbat meñ kabhī taskīn-e-dil paa.ī nahīñ jaatī

tabī.at ḳhud bahal jaatī hai bahlā.ī nahīñ jaatī

kisī se bevafā.ī par bhī ummīd-e-vafā rakhnā

ye vo Thokar hai jo har ek se khaa.ī nahīñ jaatī

mohabbat meñ ġhalat-fahmī kā honā lāzmī shai hai

ġhalat-fahmī vo gutthī hai jo suljhā.ī nahīñ jaatī

tirī hamdardiyoñ kā shukriya ai pūchhne vaale

magar kuchh baat aisī hai jo dohrā.ī nahīñ jaatī

mohabbat do diloñ ke darmiyāñ paidā jo kartī hai

vo gutthī ḳhud sulajh jaatī hai suljhā.ī nahīñ jaatī

abhī thā sāmne koī abhī nazroñ se ojhal hai

abhī duniyā jahāñ par thī vahāñ paa.ī nahīñ jaatī

jahāñ maiñ huuñ vahāñ har shai meñ un kā husn hai lekin

jahāñ vo haiñ vahāñ tak merī rusvā.ī nahīñ jaatī

mohabbat meñ buland-o-past kā ehsās kyā ma.anī

mohabbat imtiyāzī shakl meñ laa.ī nahīñ jaatī

'nihāl' ab to koī har-vaqt rahtā hai nigāhoñ meñ

nahīñ jaatī kisī kī jalva-ārā.ī nahīñ jaatī

mohabbat mein kabhi taskin-e-dil pai nahin jati

tabiat KHud bahal jati hai bahlai nahin jati

kisi se bewafai par bhi ummid-e-wafa rakhna

ye wo Thokar hai jo har ek se khai nahin jati

mohabbat mein ghalat-fahmi ka hona lazmi shai hai

ghalat-fahmi wo gutthi hai jo suljhai nahin jati

teri hamdardiyon ka shukriya ai puchhne wale

magar kuchh baat aisi hai jo dohrai nahin jati

mohabbat do dilon ke darmiyan paida jo karti hai

wo gutthi KHud sulajh jati hai suljhai nahin jati

abhi tha samne koi abhi nazron se ojhal hai

abhi duniya jahan par thi wahan pai nahin jati

jahan main hun wahan har shai mein un ka husn hai lekin

jahan wo hain wahan tak meri ruswai nahin jati

mohabbat mein buland-o-past ka ehsas kya mani

mohabbat imtiyazi shakl mein lai nahin jati

'nihaal' ab to koi har-waqt rahta hai nigahon mein

nahin jati kisi ki jalwa-arai nahin jati