mohabbat mein kami si rah gai hai

mohabbat meñ kamī sī rah ga.ī hai

ki bas ik bebasī sī rah ga.ī hai

na jaane kyuuñ hamāre darmiyāñ ab

faqat ik barhamī sī rah ga.ī hai

ajab ye sāneha guzrā hai ham par

tire ġham kī ḳhushī sī rah ga.ī hai

samundar kitne āñkhoñ meñ utāre

to phir kyuuñ tishnagī sī rah ga.ī hai

nahīñ chaḌhtā hai ab yādoñ kā dariyā

magar ik bekalī sī rah ga.ī hai

ḳhalish dil meñ koī baaqī hai ab tak

ki āñkhoñ meñ namī sī rah ga.ī hai

vahī ik baat jo kahnī thī tum se

vahī to an-kahī sī rah ga.ī hai

mohabbat mein kami si rah gai hai

ki bas ek bebasi si rah gai hai

na jaane kyun hamare darmiyan ab

faqat ek barhami si rah gai hai

ajab ye saneha guzra hai hum par

tere gham ki KHushi si rah gai hai

samundar kitne aankhon mein utare

to phir kyun tishnagi si rah gai hai

nahin chaDhta hai ab yaadon ka dariya

magar ek bekali si rah gai hai

KHalish dil mein koi baqi hai ab tak

ki aankhon mein nami si rah gai hai

wahi ek baat jo kahni thi tum se

wahi to an-kahi si rah gai hai