mohabbat mein Thani aksar yahan tak

mohabbat meñ Thanī aksar yahāñ tak

ki pahuñche mārke tiir o kamāñ tak

chale nāvak khiñchī zālim kamāñ tak

kahāñ tak imtihāñ āḳhir kahāñ tak

chale jaate haiñ āvāz-e-jaras par

pahuñch jā.eñge bichhḌe kārvāñ tak

havā-e-shauq ke jhoñke salāmat

rahoge tum pas-e-parda kahāñ tak

na vo ayyār mujh se pūchhtā hai

na dil kī baat aatī hai zabāñ tak

usī sar ko sar-e-shorīda kahiye

jo pahuñche us ke sañg-e-āstāñ tak

niyāz o naaz ke charche raheñge

hamārī aur tumhārī dāstāñ tak

'mubārak' ko koī din aur sun lo

bayāñ kā lutf hai us ḳhush-bayāñ tak

mohabbat mein Thani aksar yahan tak

ki pahunche marke tir o kaman tak

chale nawak khinchi zalim kaman tak

kahan tak imtihan aaKHir kahan tak

chale jate hain aawaz-e-jaras par

pahunch jaenge bichhDe karwan tak

hawa-e-shauq ke jhonke salamat

rahoge tum pas-e-parda kahan tak

na wo ayyar mujh se puchhta hai

na dil ki baat aati hai zaban tak

usi sar ko sar-e-shorida kahiye

jo pahunche us ke sang-e-astan tak

niyaz o naz ke charche rahenge

hamari aur tumhaari dastan tak

'mubarak' ko koi din aur sun lo

bayan ka lutf hai us KHush-bayan tak