mohabbat munh pe karna aur dil mein bewafai hai

mohabbat muñh pe karnā aur dil meñ bevafā.ī hai

ye ā.īna yahāñ kahtā hai kaisī āshnā.ī hai

bhalā bosa ham us se aaj māñgeñge kisī Dhab se

tavaqqo to nahīñ lekin ye taal.e āzmā.ī hai

muhibboñ ko kareñ haiñ qatl dushman ko jalāte haiñ

butoñ kī bhī miyāñ sāhib nirālī hī ḳhudā.ī hai

ajā.ib rasm hai un dilbarān-e-dahr kī yā rab

kisī ke saath jā sonā kahīñ saa.ī badhā.ī hai

ye āshiq apne apne ashk ko tūfān kahte haiñ

jo sach pūchho to ye gañgā hamārī hī khudā.ī hai

ilāhī kyā banegī saath mere shaiḳh-o-vā.iz ko

idhar rindī sharābī hai udhar ko pārsā.ī hai

nahīñ ye abr-o-bārāñ 'soz' ke ahvāl ko sun kar

falak kī bhī mohabbat se ye ab chhātī bhar aa.ī hai

mohabbat munh pe karna aur dil mein bewafai hai

ye aaina yahan kahta hai kaisi aashnai hai

bhala bosa hum us se aaj mangenge kisi Dhab se

tawaqqo to nahin lekin ye tale aazmai hai

muhibbon ko karen hain qatl dushman ko jalate hain

buton ki bhi miyan sahib nirali hi KHudai hai

ajaib rasm hai un dilbaran-e-dahr ki ya rab

kisi ke sath ja sona kahin sai badhai hai

ye aashiq apne apne ashk ko tufan kahte hain

jo sach puchho to ye ganga hamari hi khudai hai

ilahi kya banegi sath mere shaiKH-o-waiz ko

idhar rindi sharabi hai udhar ko parsai hai

nahin ye abr-o-baran 'soz' ke ahwal ko sun kar

falak ki bhi mohabbat se ye ab chhati bhar aai hai