mohabbat pe shayad zawal aa raha hai

mohabbat pe shāyad zavāl aa rahā hai

ki ab zindagī kā savāl aa rahā hai

fazā mahkī mahkī hai sehn-e-chaman kī

jo aaj ik yahāñ gul-misāl aa rahā hai

karūñ kis tarah un se tark-e-ta.alluq

mujhe un ke dil kā ḳhayāl aa rahā hai

ye kis ke tasavvur meñ ai jān-e-armāñ

tujhe bhī sar-e-bazm haal aa rahā hai

guzar sā gayā sāneha kyā chaman meñ

guloñ par jo rañg-e-malāl aa rahā hai

ye dasht-e-havas hai jafāoñ kī duniyā

idhar kyuuñ hujūm-e-ġhazāl aa rahā hai

vo bol uTThe dekhā jo āshiq ko aate

idhar koī āshufta-hāl aa rahā hai

'zafar' ye hai us but kī yādoñ kā sadqa

shab-e-hijr lutf-e-visāl aa rahā hai

mohabbat pe shayad zawal aa raha hai

ki ab zindagi ka sawal aa raha hai

faza mahki mahki hai sehn-e-chaman ki

jo aaj ek yahan gul-misal aa raha hai

karun kis tarah un se tark-e-talluq

mujhe un ke dil ka KHayal aa raha hai

ye kis ke tasawwur mein ai jaan-e-arman

tujhe bhi sar-e-bazm haal aa raha hai

guzar sa gaya saneha kya chaman mein

gulon par jo rang-e-malal aa raha hai

ye dasht-e-hawas hai jafaon ki duniya

idhar kyun hujum-e-ghazal aa raha hai

wo bol uTThe dekha jo aashiq ko aate

idhar koi aashufta-haal aa raha hai

'zafar' ye hai us but ki yaadon ka sadqa

shab-e-hijr lutf-e-visal aa raha hai