mohabbat wo hai jis mein kuchh kisi se ho nahin sakta

mohabbat vo hai jis meñ kuchh kisī se ho nahīñ saktā

jo ho saktā hai vo bhī aadmī se ho nahīñ saktā

ye kahnā hai to kyā kahnā ki kahte kahte ruk jaanā

bayān-e-hasrat-e-dil bhī to jī se ho nahīñ saktā

uchaTtī sī nigāheñ kab jigar ke paar hotī haiñ

karo ḳhuuñ dost ban kar dushmanī se ho nahīñ saktā

hameñ kyoñ dil diyā aur dilrubā.ī un meñ kyoñ rakkhī

ḳhudā dushman butoñ kī bandagī se ho nahīñ saktā

dam-e-ruḳhsat vo mujh ko dekh kar be-ḳhud to kyā hogā

na uThne deñ unheñ ye bhī ġhashī se ho nahīñ saktā

ba-rañg-e-nāla kis kis dhuum se uḌtā hai rañg apnā

tirī furqat kā parda ḳhāmushī se ho nahīñ saktā

'qalaq' paiġhām terā aur bayāñ phir us sitamgar se

kisī se ho nahīñ saktā kisī se ho nahīñ saktā

mohabbat wo hai jis mein kuchh kisi se ho nahin sakta

jo ho sakta hai wo bhi aadmi se ho nahin sakta

ye kahna hai to kya kahna ki kahte kahte ruk jaana

bayan-e-hasrat-e-dil bhi to ji se ho nahin sakta

uchaTti si nigahen kab jigar ke par hoti hain

karo KHun dost ban kar dushmani se ho nahin sakta

hamein kyon dil diya aur dilrubai un mein kyon rakkhi

KHuda dushman buton ki bandagi se ho nahin sakta

dam-e-ruKHsat wo mujh ko dekh kar be-KHud to kya hoga

na uThne den unhen ye bhi ghashi se ho nahin sakta

ba-rang-e-nala kis kis dhum se uDta hai rang apna

teri furqat ka parda KHamushi se ho nahin sakta

'qalaq' paigham tera aur bayan phir us sitamgar se

kisi se ho nahin sakta kisi se ho nahin sakta