mohabbaton ka jo sar par wabaal rakkha hai

mohabbatoñ kā jo sar par vabāl rakkhā hai

futūr-e-ishq hai aur ham ne paal rakkhā hai

ye intiḳhāb jo ham ne kiyā hai jiine kā

firāq chun liyā hai aur visāl rakkhā hai

kisī bhī roz milo aur udāsiyāñ le lo

ham aise log haiñ sab pur-malāl rakkhā hai

ḳhizāñ ke phuul sañjo.e kitāb meñ rakkhe

fasīl-e-ġham se yuuñ rishta bahāl rakkhā hai

vo āḳhirash mujhe ḳhvāboñ meñ dekhne aayā

mire gale kā bhī kaisā ḳhayāl rakkhā hai

ye daur vo hai ki dil meñ koī rakhe na rakhe

nazar meñ sab ne mujhe bahr-e-hāl rakkhā hai

maiñ lā-javāb huī yuuñ kuchh us kī bātoñ se

mire savāl pe us ne savāl rakkhā hai

ġhazal ke sher mire kab ke mar ga.e hote

samā.atoñ ne unheñ dekh-bhāl rakkhā hai

mohabbaton ka jo sar par wabaal rakkha hai

futur-e-ishq hai aur hum ne pal rakkha hai

ye intiKHab jo hum ne kiya hai jine ka

firaq chun liya hai aur visal rakkha hai

kisi bhi roz milo aur udasiyan le lo

hum aise log hain sab pur-malal rakkha hai

KHizan ke phul sanjoe kitab mein rakkhe

fasil-e-gham se yun rishta bahaal rakkha hai

wo aaKHirash mujhe KHwabon mein dekhne aaya

mere gale ka bhi kaisa KHayal rakkha hai

ye daur wo hai ki dil mein koi rakhe na rakhe

nazar mein sab ne mujhe bahr-e-haal rakkha hai

main la-jawab hui yun kuchh us ki baaton se

mere sawal pe us ne sawal rakkha hai

ghazal ke sher mere kab ke mar gae hote

samaaton ne unhen dekh-bhaal rakkha hai