mohabbaton ko kahin aur pal kar dekho

mohabbatoñ ko kahīñ aur paal kar dekho

matā-e-jāñ ko badan se nikāl kar dekho

badal ke dekho kabhī nisbatoñ kī duniyā ko

badan ko ruuh ke ḳhāne meñ Daal kar dekho

suno use to samā.at se māvarā ho kar

jo dekhnā ho to āñkheñ nikāl kar dekho

yaqīn dasht se phūTegā āb-e-jū kī tarah

ki harf-e-''lā'' kī gavāhī bahāl kar dekho

nafas nafas hai yahāñ maqbara aqīdat kā

ye maqbaroñ kā jahāñ pā.emāl kar dekho

isī havā meñ mohabbat kā diip jaltā hai

isī jahāñ ko jahān-e-visāl kar dekho

vo sañg de to harārat nichoḌ lo apnī

jo phuul de to nigāh-e-kamāl kar dekho

phir us ke ba.ad koī Dar nahīñ talātum kā

us ek buuñd ke ġham ko vishāl kar dekho

badan kī pyaas bhī ik māvarā kahānī hai

har ek buuñd ko dariyā ḳhayāl kar dekho

palaT ke ā.eñge sāvan ke rañg ā.ankhoñ meñ

tum apne-āp se rishta bahāl kar dekho

vo boltā hai pahāḌoñ kī oT se aksar

kisī pahāḌ se us kā savāl kar dekho

ye raaz aur kahāñ tak hameñ nibhānā hai

kabhī to raat meñ sūraj nikāl kar dekho

tum apne gauhar-e-yaktā ko is tarah DhūñDo

ki ḳhud ko be-sar-o-sāmāñ ḳhayāl kar dekho

jo dekhnā ho kabhī dostoñ kā dil 'ahmad'

khare usuul kā pattā uchhāl kar dekho

mohabbaton ko kahin aur pal kar dekho

mata-e-jaan ko badan se nikal kar dekho

badal ke dekho kabhi nisbaton ki duniya ko

badan ko ruh ke KHane mein Dal kar dekho

suno use to samaat se mawara ho kar

jo dekhna ho to aankhen nikal kar dekho

yaqin dasht se phuTega aab-e-ju ki tarah

ki harf-e-la ki gawahi bahaal kar dekho

nafas nafas hai yahan maqbara aqidat ka

ye maqbaron ka jahan paemal kar dekho

isi hawa mein mohabbat ka dip jalta hai

isi jahan ko jahan-e-visal kar dekho

wo sang de to hararat nichoD lo apni

jo phul de to nigah-e-kamal kar dekho

phir us ke baad koi Dar nahin talatum ka

us ek bund ke gham ko wishaal kar dekho

badan ki pyas bhi ek mawara kahani hai

har ek bund ko dariya KHayal kar dekho

palaT ke aaenge sawan ke rang aaankhon mein

tum apne-ap se rishta bahaal kar dekho

wo bolta hai pahaDon ki oT se aksar

kisi pahaD se us ka sawal kar dekho

ye raaz aur kahan tak hamein nibhana hai

kabhi to raat mein suraj nikal kar dekho

tum apne gauhar-e-yakta ko is tarah DhunDo

ki KHud ko be-sar-o-saman KHayal kar dekho

jo dekhna ho kabhi doston ka dil 'ahmad'

khare usul ka patta uchhaal kar dekho