mubtala ye dil hua jab yar nanga ho gaya

mubtalā ye dil huā jab yaar nañgā ho gayā

sham.a be-parda huī qurbāñ patañgā ho gayā

gir paḌe ushshāq us kī teġh-e-ḳhūñ-āshām par

kal shahādat ke talab-gāroñ kā dañgā ho gayā

dafn kar ke fātiha paḌh ke mirā bolā vo shoḳh

aaj bīmār-e-mohabbat merā chañgā ho gayā

bazm meñ jal kar kiyā shab rāz-e-ulfat āshkār

sham.a ke mānind parvāna bhī nañgā ho gayā

gir ke us ke kūcha-e-tārīk meñ niklā na dil

pech-e-zulf-e-yār kā mujh ko aḌañgā ho gayā

vasf dair-o-ka.aba kā ham ne judāgāna kiyā

ek hī mazmūn thā fiqara do-rañgā ho gayā

baḌhte baḌhte apnā tūl-e-zindagānī kam huā

ghaTte ghaTte jāma-e-hastī uTañgā ho gayā

ḳhushnumā hai us ruḳh-e-raushan pe kyā ḳhāl-e-siyāh

zeb gulzār-e-iram kā lā-bhujañgā ho gayā

shāh-e-haft-aqlīm se ai dil gadā-e-dahr tak

Dhañg se aayā vahāñ se yaañ kaDhañgā ho gayā

jis qadar vo mujh se bigḌā maiñ bhī bigḌā us qadar

vo huā jaame se bāhar meñ bhī nañgā ho gayā

yuuñ kaheñge yaar iqlīm-e-suḳhan meñ in dinoñ

'muntahī' bhī ek hī kaTTā-dabañgā ho gayā

mubtala ye dil hua jab yar nanga ho gaya

shama be-parda hui qurban patanga ho gaya

gir paDe ushshaq us ki tegh-e-KHun-asham par

kal shahadat ke talab-garon ka danga ho gaya

dafn kar ke fatiha paDh ke mera bola wo shoKH

aaj bimar-e-mohabbat mera changa ho gaya

bazm mein jal kar kiya shab raaz-e-ulfat aashkar

shama ke manind parwana bhi nanga ho gaya

gir ke us ke kucha-e-tarik mein nikla na dil

pech-e-zulf-e-yar ka mujh ko aDanga ho gaya

wasf dair-o-kaba ka hum ne judagana kiya

ek hi mazmun tha fiqara do-ranga ho gaya

baDhte baDhte apna tul-e-zindagani kam hua

ghaTte ghaTte jama-e-hasti uTanga ho gaya

KHushnuma hai us ruKH-e-raushan pe kya KHal-e-siyah

zeb gulzar-e-iram ka la-bhujanga ho gaya

shah-e-haft-aqlim se ai dil gada-e-dahr tak

Dhang se aaya wahan se yan kaDhanga ho gaya

jis qadar wo mujh se bigDa main bhi bigDa us qadar

wo hua jame se bahar mein bhi nanga ho gaya

yun kahenge yar iqlim-e-suKHan mein in dinon

'muntahi' bhi ek hi kaTTa-dabanga ho gaya