mudam chalna hai mushkil to mere sath na chal

mudām chalnā hai mushkil to mere saath na chal

tujhe hai hājat-e-mahmil to mere saath na chal

safar hī jis kī hai manzil maiñ vo musāfir huuñ

safar kā chāhe tū hāsil to mere saath na chal

bahut aziiz hai mujh ko mirā adhūrā-pan

tujhe hai honā mukammal to mere saath na chal

maiñ toḌ aaya huuñ bandhan sabhī rivājoñ ke

tū gar hai pā-ba-salāsil to mere saath na chal

nahīñ pasand zamāne kī dauḌ-bhāg mujhe

tū gar hai dauḌ meñ shāmil to mere saath na chal

milī hai āñkheñ to lāzim nahīñ ki dil bhī mileñ

mile na dil se agar dil to mere saath na chal

tirī nazar meñ jahālat hai sādgī shāyad

nahīñ maiñ saath ke qābil to mere saath na chal

mudam chalna hai mushkil to mere sath na chal

tujhe hai hajat-e-mahmil to mere sath na chal

safar hi jis ki hai manzil main wo musafir hun

safar ka chahe tu hasil to mere sath na chal

bahut aziz hai mujh ko mera adhura-pan

tujhe hai hona mukammal to mere sath na chal

main toD aaya hun bandhan sabhi riwajon ke

tu gar hai pa-ba-salasil to mere sath na chal

nahin pasand zamane ki dauD-bhag mujhe

tu gar hai dauD mein shamil to mere sath na chal

mili hai aankhen to lazim nahin ki dil bhi milen

mile na dil se agar dil to mere sath na chal

teri nazar mein jahaalat hai sadgi shayad

nahin main sath ke qabil to mere sath na chal