mudam le ke mujhe halqa-war nachti hai

mudām le ke mujhe halqa-vār nāchtī hai

jidhar chalūñ nigah-e-tarah-dār nāchtī hai

milā hai va.ada-e-fardā bajā.e naqd-e-visāl

hamārī ruuh ko dekho udhār nāchtī hai

ye kis nazar ne tilism-e-ḳhizāñ ko kaaT diyā

palak jhapakte meñ har sū bahār nāchtī hai

phire malūl vo dargāh ke ahāte meñ

aur aa.e vajd meñ to be-shumār nāchtī hai

paTaḳh ke sar kabhī rotā hai hijr kā āzār

umīd-e-vasl kabhī baar baar nāchtī hai

vahī nahīñ use darkār izn-e-ḳhākī thā

jo mil gayā to ye musht-e-ġhubār nāchtī hai

hamārī ruuh 'tabassum' suḳhan kī hai jogan

ġhazal ke gar kahīñ chhiḌ jaa.eñ taar nāchtī hai

mudam le ke mujhe halqa-war nachti hai

jidhar chalun nigah-e-tarah-dar nachti hai

mila hai wada-e-farda bajae naqd-e-visal

hamari ruh ko dekho udhaar nachti hai

ye kis nazar ne tilism-e-KHizan ko kaT diya

palak jhapakte mein har su bahaar nachti hai

phire malul wo dargah ke ahate mein

aur aae wajd mein to be-shumar nachti hai

paTaKH ke sar kabhi rota hai hijr ka aazar

umid-e-wasl kabhi bar bar nachti hai

wahi nahin use darkar izn-e-KHaki tha

jo mil gaya to ye musht-e-ghubar nachti hai

hamari ruh 'tabassum' suKHan ki hai jogan

ghazal ke gar kahin chhiD jaen tar nachti hai