muddat se aarzu hai dil-e-be-qarar mein

muddat se aarzū hai dil-e-be-qarār meñ

kuchh to kamī ho talḳhī-e-lail-o-nahār meñ

kyā jaane kaise ho gayā kyūñkar ye ho gayā

raunaq rahī na pahlī sī fasl-e-bahār meñ

takmīl-e-shauq meñ na kabhī mil sakī vo shai

jo thī qadam qadam tapish-e-intizār meñ

āb-e-ravāñ kī pahuñchīñ yahāñ tak kasāfateñ

ghuTne lagā hai maahī kā dam jū-e-bār meñ

duniyā kī talḳhiyoñ ne use bhī miTā diyā

miltā thā bāñkpan jo kabhī nigh-e-yār meñ

ishrat mile har ek ko to koī baat hai

ye kyā ki baT rahe vo faqat do hī chaar meñ

muddat se aarzu hai dil-e-be-qarar mein

kuchh to kami ho talKHi-e-lail-o-nahaar mein

kya jaane kaise ho gaya kyunkar ye ho gaya

raunaq rahi na pahli si fasl-e-bahaar mein

takmil-e-shauq mein na kabhi mil saki wo shai

jo thi qadam qadam tapish-e-intizar mein

aab-e-rawan ki pahunchin yahan tak kasafaten

ghuTne laga hai mahi ka dam ju-e-bar mein

duniya ki talKHiyon ne use bhi miTa diya

milta tha bankpan jo kabhi nigh-e-yar mein

ishrat mile har ek ko to koi baat hai

ye kya ki baT rahe wo faqat do hi chaar mein