muddaton baad usi shaKHs ki yaad aai hai

muddatoñ baa'd usī shaḳhs kī yaad aa.ī hai

shaḳhs bhī vo jo ki muddat hī se harjā.ī hai

ab kahāñ jāoge kis dar pe duhā.ī doge

is zamāne meñ tumhārī kahāñ sunvā.ī hai

aur kī samt kyoñ angusht-numā hai pyāre

terā kirdār hī tere liye dukh-dā.ī hai

bāġhbāñ tujh se chaman ḳhauf-zada hai saarā

gul haiñ ḳhāmosh sabhī har kalī murjhā.ī hai

zaḳhm denā tirā phir un pe lagānā marham

vaah kyā ḳhuub ye andāz-e-masīhā.ī hai

vaise is daur meñ mushkil hai guzārā karnā

aur is par ye sitam toḌtī mahñgā.ī hai

vaqt badlā to vo ye bhuul ga.e haiñ 'faisal'

'umr-bhar saath nibhāne kī qasam khaa.ī hai

muddaton ba'd usi shaKHs ki yaad aai hai

shaKHs bhi wo jo ki muddat hi se harjai hai

ab kahan jaoge kis dar pe duhai doge

is zamane mein tumhaari kahan sunwai hai

aur ki samt kyon angusht-numa hai pyare

tera kirdar hi tere liye dukh-dai hai

baghban tujh se chaman KHauf-zada hai sara

gul hain KHamosh sabhi har kali murjhai hai

zaKHm dena tera phir un pe lagana marham

wah kya KHub ye andaz-e-masihai hai

waise is daur mein mushkil hai guzara karna

aur is par ye sitam toDti mahngai hai

waqt badla to wo ye bhul gae hain 'faisal'

'umr-bhar sath nibhane ki qasam khai hai