muddaton baad jo hum shahr mein kal aae hain

muddatoñ baad jo ham shahr meñ kal aa.e haiñ

ḳhair-maqdam se bhare radd-e-amal aa.e haiñ

kyā gunahgāroñ kī fihrist hai aane vaalī

kis liye aap kī peshānī pe bal aa.e haiñ

vasl hī vasl hai ab hijr jahāñ likkhā thā

qissa-e-ishq kā unvān badal aa.e haiñ

sab ko ye manzar-e-āseb dikhāyā kis ne

aaj kal sab ke dimāġhoñ meñ ḳhalal aa.e haiñ

pīchhā karte hue ham ek ġhazal kā kal raat

'mīr' kī dillī se punjab nikal aa.e haiñ

us ko ab karnā ho jo tark-e-ta.alluq kar le

ham malāl-e-dil-e-betāb ugal aa.e haiñ

hazrat-e-qais haiñ ham-zād hamāre 'dilbar'

ham se milne ke liye pahle pahal aa.e haiñ

muddaton baad jo hum shahr mein kal aae hain

KHair-maqdam se bhare radd-e-amal aae hain

kya gunahgaron ki fihrist hai aane wali

kis liye aap ki peshani pe bal aae hain

wasl hi wasl hai ab hijr jahan likkha tha

qissa-e-ishq ka unwan badal aae hain

sab ko ye manzar-e-aseb dikhaya kis ne

aaj kal sab ke dimaghon mein KHalal aae hain

pichha karte hue hum ek ghazal ka kal raat

'mir' ki dilli se punjab nikal aae hain

us ko ab karna ho jo tark-e-talluq kar le

hum malal-e-dil-e-betab ugal aae hain

hazrat-e-qais hain ham-zad hamare 'dilbar'

hum se milne ke liye pahle pahal aae hain