muddaton ke baad phir un ke payam aane lage

muddatoñ ke baad phir un ke payām aane lage

vaqt phir bhūle hue qisse na dohrāne lage

jhiil ke Thahre hue paanī meñ phir lahreñ uThīñ

phir ga.e mausam ke panchhī lauT kar aane lage

ham ki patthar the nishān-e-mīl ban kar rah ga.e

ḳhud na chal paa.e to sab ko raah dikhlāne lage

dāstānoñ meñ jo pariyāñ qaid thiiñ sab uḌ ga.iiñ

shahr-e-jāñ meñ ḳhauf ke aaseb mañDlāne lage

ghar ke sab dīvār-o-dar haiñ ghar ke būḌhoñ kī tarah

maiñ kisī shab der se lauTā to samjhāne lage

'kaif' din-bhar kī thakī haarī tamannāoñ ko ham

raat aa.ī to qabā ḳhvāboñ kī pahnāne lage

muddaton ke baad phir un ke payam aane lage

waqt phir bhule hue qisse na dohrane lage

jhil ke Thahre hue pani mein phir lahren uThin

phir gae mausam ke panchhi lauT kar aane lage

hum ki patthar the nishan-e-mil ban kar rah gae

KHud na chal pae to sab ko rah dikhlane lage

dastanon mein jo pariyan qaid thin sab uD gain

shahr-e-jaan mein KHauf ke aaseb manDlane lage

ghar ke sab diwar-o-dar hain ghar ke buDhon ki tarah

main kisi shab der se lauTa to samjhane lage

'kaif' din-bhar ki thaki haari tamannaon ko hum

raat aai to qaba KHwabon ki pahnane lage