muhajir hain rahne ko ghar mangte hain

muhājir haiñ rahne ko ghar māñgte haiñ

ye kyā ham se ahl-e-safar māñgte haiñ

bahut pī chuke haiñ shafaq kā lahū ham

nayā ek jām-e-sahar māñgte haiñ

tirā naqsh-e-pā gar nahīñ hai to kyā ġham

havādis mirī rahguzar māñgte haiñ

ġhanīmat haiñ TuuTe hue aa.ine bhī

ye patthar to dast-e-hunar māñgte haiñ

hai zinda qafas meñ chaman kī tamannā

azā.em mire bāl-o-par māñgte haiñ

nazāroñ ke parde uThā kar to dekho

nazāre bhī husn-e-nazar māñgte haiñ

sabaq de rahe the jo zabt-e-alam kā

vahī 'tāj' soz-e-jigar māñgte haiñ

muhajir hain rahne ko ghar mangte hain

ye kya hum se ahl-e-safar mangte hain

bahut pi chuke hain shafaq ka lahu hum

naya ek jam-e-sahar mangte hain

tera naqsh-e-pa gar nahin hai to kya gham

hawadis meri rahguzar mangte hain

ghanimat hain TuTe hue aaine bhi

ye patthar to dast-e-hunar mangte hain

hai zinda qafas mein chaman ki tamanna

azaem mere baal-o-par mangte hain

nazaron ke parde uTha kar to dekho

nazare bhi husn-e-nazar mangte hain

sabaq de rahe the jo zabt-e-alam ka

wahi 'taj' soz-e-jigar mangte hain