mujhko apni KHudi se nafrat hai

mujh ko apnī ḳhudī se nafrat hai

apnī hastī se hī adāvat hai

kaam aatā nahīñ hai aur ilaaj

vasl hī chāra-sāz-e-furqat hai

ai falak kyā bigāḌā maiñ ne tirā

mujh se kis vāste adāvat hai

maiñ huuñ ai jaañ vafā-shi.ār tirā

zulm karnā to terī aadat hai

ishq kar ke huā huuñ maiñ badnām

dil lagānā bhī ik musībat hai

tū ne itnā bhī to nahīñ pūchhā

in dinoñ kaisī terī hālat hai

nikal aate haiñ qabr se murde

terī Thokar meñ ik qayāmat hai

tauba lab par hai dil meñ shauq-e-sharāb

shaiḳh jī kyā burī ye illat hai

ek majzūb hai jo ḳhāk-nashīñ

arsh-e-a.alā se us ko nisbat hai

ye jo kasrat hai apne pesh-e-nazar

yahī vahdat kī ik alāmat hai

aap ne jo mizāj-pursī kī

aap kī ye baḌī ināyat hai

sohbat-e-bad se ijtināb karo

varna ik roz is meñ zillat hai

ruuTh jaanā zarā sī bātoñ par

bachpane kī tumhārī aadat hai

ḳhauf kyā dushmanī se dushman kī

'shād' par jab ḳhudā kī rahmat hai

mujh ko apni KHudi se nafrat hai

apni hasti se hi adawat hai

kaam aata nahin hai aur ilaj

wasl hi chaara-saz-e-furqat hai

ai falak kya bigaDa main ne tera

mujh se kis waste adawat hai

main hun ai jaan wafa-shiar tera

zulm karna to teri aadat hai

ishq kar ke hua hun main badnam

dil lagana bhi ek musibat hai

tu ne itna bhi to nahin puchha

in dinon kaisi teri haalat hai

nikal aate hain qabr se murde

teri Thokar mein ek qayamat hai

tauba lab par hai dil mein shauq-e-sharab

shaiKH ji kya buri ye illat hai

ek majzub hai jo KHak-nashin

arsh-e-ala se us ko nisbat hai

ye jo kasrat hai apne pesh-e-nazar

yahi wahdat ki ek alamat hai

aap ne jo mizaj-pursi ki

aap ki ye baDi inayat hai

sohbat-e-bad se ijtinab karo

warna ek roz is mein zillat hai

ruTh jaana zara si baaton par

bachpane ki tumhaari aadat hai

KHauf kya dushmani se dushman ki

'shad' par jab KHuda ki rahmat hai