mujhko jahan mein koi dil-ara nahin mila

mujh ko jahāñ meñ koī dil-ārā nahīñ milā

maiñ ḳhud bhī apne ġham kā shanāsā nahīñ milā

apnī talab ke apnī ġharaz ke mile haiñ log

merī talab ko dekhne vaalā nahīñ milā

phirtā rahā huuñ kū-e-vafā meñ tamām umr

lekin kahīñ bhī koī shanāsā nahīñ milā

mere uyuub par rahī har shaḳhs kī nigāh

koī hunar ko dekhne vaalā nahīñ milā

ḳhanjar-ba-kaf to log mile har jagah magar

marham-ba-dast koī masīhā nahīñ milā

ye bhī huā ki maiñ ne jo sochā nahīñ huā

ye bhī huā ki dil ne jo chāhā nahīñ milā

milne ga.e the raat ko 'shaukat' se ham magar

thā vo hujūm-e-fikr meñ tanhā nahīñ milā

mujh ko jahan mein koi dil-ara nahin mila

main KHud bhi apne gham ka shanasa nahin mila

apni talab ke apni gharaz ke mile hain log

meri talab ko dekhne wala nahin mila

phirta raha hun ku-e-wafa mein tamam umr

lekin kahin bhi koi shanasa nahin mila

mere uyub par rahi har shaKHs ki nigah

koi hunar ko dekhne wala nahin mila

KHanjar-ba-kaf to log mile har jagah magar

marham-ba-dast koi masiha nahin mila

ye bhi hua ki main ne jo socha nahin hua

ye bhi hua ki dil ne jo chaha nahin mila

milne gae the raat ko 'shaukat' se hum magar

tha wo hujum-e-fikr mein tanha nahin mila