mujhko kabhi bhi un se shikayat hui nahin

mujh ko kabhī bhī un se shikāyat huī nahīñ

shāyad isī liye to mohabbat huī nahīñ

ġhairoñ se mehrbānī kī ummīd kyā kareñ

ham par to aap kī bhī ināyat huī nahīñ

vo log kūche kūche bhaTakne lage haiñ aaj

jin ko ḳhud apne ghar se bhī chāhat huī nahīñ

ham hī to the jo vaqt pe hī kaam aa ga.e

achchhā huā ki ham se adāvat huī nahīñ

maiñ ne kabhī kisī kā dukhāyā nahīñ hai dil

mujh ko kabhī kisī se nadāmat huī nahīñ

tūfān-e-bād-o-bārāñ meñ sab bah gayā 'kiran'

barsāt ab kī bā.is-e-rahmat huī nahīñ

mujh ko kabhi bhi un se shikayat hui nahin

shayad isi liye to mohabbat hui nahin

ghairon se mehrbani ki ummid kya karen

hum par to aap ki bhi inayat hui nahin

wo log kuche kuche bhaTakne lage hain aaj

jin ko KHud apne ghar se bhi chahat hui nahin

hum hi to the jo waqt pe hi kaam aa gae

achchha hua ki hum se adawat hui nahin

main ne kabhi kisi ka dukhaya nahin hai dil

mujh ko kabhi kisi se nadamat hui nahin

tufan-e-baad-o-baran mein sab bah gaya 'kiran'

barsat ab ki bais-e-rahmat hui nahin