mujhko koi bhi sila milne mein dushwari na thi

mujh ko koī bhī sila milne meñ dushvārī na thī

sab hunar aate the lekin 'aql se yaarī na thī

jin dinoñ iḳhlās meñ thoḌī sī 'ayyārī na thī

husn ke darbār meñ sābit vafādārī na thī

sar-kashī ke ahd-nāmoñ kī hifāzat ke liye

mere qalb-o-jāñ se behtar koī almārī na thī

jin usūloñ ke liye jiinā bahut mushkil huā

un kī ḳhātir jaan de dene meñ dushvārī na thī

husn hī kā vo 'ilāqa thā jahāñ sab kuchh milā

'ishq kī apnī alag koī zamīñ-dārī na thī

sab pareshāñ haiñ ki āḳhir kis vabā meñ vo mire

jin ko ġhurbat ke 'alāva koī bīmārī na thī

kis tarah bād-e-fanā se maiñ bachā letā use

us ġhazal paikar meñ koī fan kī chingārī na thī

roz ik muuzī ko neze par uThātā thā 'na'īm'

inqilābī quvvatoñ kī jab samajhdārī na thī

mujh ko koi bhi sila milne mein dushwari na thi

sab hunar aate the lekin 'aql se yari na thi

jin dinon iKHlas mein thoDi si 'ayyari na thi

husn ke darbar mein sabit wafadari na thi

sar-kashi ke ahd-namon ki hifazat ke liye

mere qalb-o-jaan se behtar koi almari na thi

jin usulon ke liye jina bahut mushkil hua

un ki KHatir jaan de dene mein dushwari na thi

husn hi ka wo 'ilaqa tha jahan sab kuchh mila

'ishq ki apni alag koi zamin-dari na thi

sab pareshan hain ki aaKHir kis waba mein wo mere

jin ko ghurbat ke 'alawa koi bimari na thi

kis tarah baad-e-fana se main bacha leta use

us ghazal paikar mein koi fan ki chingari na thi

roz ek muzi ko neze par uThata tha 'na'im'

inqilabi quwwaton ki jab samajhdari na thi