mujhko mahsus hone laga hai KHuda pahle jaisa nahin

mujh ko mahsūs hone lagā hai ḳhudā pahle jaisā nahīñ

ye nahīñ mere kahne kā matlab ki jaisā hai achchhā nahīñ

kaise kaise na mab.hūt-kun sher nāzil hue qalb par

terī haibat ke shāyān-e-shāñ ek misra bhī utrā nahīñ

chal fanā ke safar meñ yahī raḳht hamrāh le kar chaleñ

is qadar muḳhtasar zindagī meñ to ġham ḳharch hogā nahīñ

yuuñ mayassar ko ham ne muassir kiyā ḳhud ko behtar kiyā

varna bin tere ham the akele koī aur bhāyā nahīñ

raat bhar ḳhvāb mele se ta.abīreñ ham ne ḳharīdīñ vahāñ

bik rahā thā vahī maal jis ko kabhī pahle dekhā nahīñ

mere ghar se nikaltī to hai ek rah tere ghar kī taraf

us pe pindār-e-hastī magar mere hamrāh chaltā nahīñ

vaqt puurā huā chāhtā hai magar ham adhūre abhī

kho chuke haiñ tujhe aur ḳhud ko abhī ham ne paayā nahīñ

mujh ko mahsus hone laga hai KHuda pahle jaisa nahin

ye nahin mere kahne ka matlab ki jaisa hai achchha nahin

kaise kaise na mabhut-kun sher nazil hue qalb par

teri haibat ke shayan-e-shan ek misra bhi utra nahin

chal fana ke safar mein yahi raKHt hamrah le kar chalen

is qadar muKHtasar zindagi mein to gham KHarch hoga nahin

yun mayassar ko hum ne muassir kiya KHud ko behtar kiya

warna bin tere hum the akele koi aur bhaya nahin

raat bhar KHwab mele se tabiren hum ne KHaridin wahan

bik raha tha wahi mal jis ko kabhi pahle dekha nahin

mere ghar se nikalti to hai ek rah tere ghar ki taraf

us pe pindar-e-hasti magar mere hamrah chalta nahin

waqt pura hua chahta hai magar hum adhure abhi

kho chuke hain tujhe aur KHud ko abhi hum ne paya nahin