mujhko na aazma sitam-e-rozgar se

mujh ko na aazmā sitam-e-rozgār se

maiñ tujh se duur huuñ na tire iḳhtiyār se

badleñge ahl-e-dil na kisī e'tibār se

sarkār dushmanī se navāzeñ ki pyaar se

ye kyā ki sirf rañg gulistāñ badal diyā

ham ne kuchh aur bhī to kahā thā bahār se

yārab ye kis nahaj pe haiñ dil ke muāmalāt

ham ġhair-mutma.in se na vo be-qarār se

āḳhir ḳhud apne sāmne aanā paḌā hameñ

uktā chuke the silsila-e-intizār se

barse haiñ kis ke ḳhuun ke bādal chaman chaman

laa.ī kahāñ se rañg ye pūchho bahār se

ham ro liye ki sabz-o-gul meñ tarī rahe

hañste agar to aag barastī bahār se

be-shak hai nā-ḳhudā kī mohabbat bhī un ke saath

'anjum' ḳhudā kā naam jo lete haiñ pyaar se

mujh ko na aazma sitam-e-rozgar se

main tujh se dur hun na tere iKHtiyar se

badlenge ahl-e-dil na kisi e'tibar se

sarkar dushmani se nawazen ki pyar se

ye kya ki sirf rang gulistan badal diya

hum ne kuchh aur bhi to kaha tha bahaar se

yarab ye kis nahaj pe hain dil ke muamalat

hum ghair-mutmain se na wo be-qarar se

aaKHir KHud apne samne aana paDa hamein

ukta chuke the silsila-e-intizar se

barse hain kis ke KHun ke baadal chaman chaman

lai kahan se rang ye puchho bahaar se

hum ro liye ki sabz-o-gul mein tari rahe

hanste agar to aag barasti bahaar se

be-shak hai na-KHuda ki mohabbat bhi un ke sath

'anjum' KHuda ka nam jo lete hain pyar se