mujhko talab to nai duniya ki hai

mujh ko talab to na.ī duniyā kī hai

rāhbarī naqsh-e-kaf-e-pā kī hai

bādiya-paimā.ī-e-vahshat se tañg

be-ufaqī vus.at-e-sahrā kī hai

hai vahī maujūd jo hai dīdanī

raa.e yahī dīda-e-bīnā kī hai

ghuur rahī hai jise pyāsī nazar

shakl vo mai kī nahīñ miinā kī hai

dil-kashī-e-pech-o-ḳham-e-pairahan

den ḳham-o-pech-e-sarāpā kī hai

zulf-e-pareshāñ ke talavvun meñ bhī

ḳhūbī-e-tamkīñ ruḳh-e-zebā kī hai

mujh se vo hai mujh se ziyāda qarīb

ḳhvāhish-e-qurb us se ziyāda kī hai

yuuñ to kināyoñ kā bhī aadī hai daar

dil kī havas is ke alāva kī hai

naqsh meñ nuqtoñ ke sivā kuchh nahīñ

shakl-garī shauq-e-tamāshā kī hai

sabt 'muhib' us lab-e-jāñ-baḳhsh par

tishna-labī merī tamannā kī hai

mujh ko talab to nai duniya ki hai

rahbari naqsh-e-kaf-e-pa ki hai

baadiya-paimai-e-wahshat se tang

be-ufaqi wusat-e-sahra ki hai

hai wahi maujud jo hai didani

rae yahi dida-e-bina ki hai

ghur rahi hai jise pyasi nazar

shakl wo mai ki nahin mina ki hai

dil-kashi-e-pech-o-KHam-e-pairahan

den KHam-o-pech-e-sarapa ki hai

zulf-e-pareshan ke talawwun mein bhi

KHubi-e-tamkin ruKH-e-zeba ki hai

mujh se wo hai mujh se ziyaada qarib

KHwahish-e-qurb us se ziyaada ki hai

yun to kinayon ka bhi aadi hai dar

dil ki hawas is ke alawa ki hai

naqsh mein nuqton ke siwa kuchh nahin

shakl-gari shauq-e-tamasha ki hai

sabt 'muhib' us lab-e-jaan-baKHsh par

tishna-labi meri tamanna ki hai