mujhko thapak thapak ke sulata raha charagh

mujh ko thapak thapak ke sulātā rahā charāġh

pahlū meñ raat bhar mire baiThā rahā charāġh

kahtā rahā ki raat ye kitnī hasīn hai

tīra-shabī kā girya bhī kartā rahā charāġh

sūraj kā ek baar faqat naam kyā liyā

mujh se tamām raat hī laḌtā rahā charāġh

us ko mirī shikast kī itnī ḳhushī huī

hāthoñ pe haath maar ke hañstā rahā charāġh

maiñ us kī zard lau meñ ḳhudā dekhtā rahā

kamre meñ raat bhar mire jaltā rahā charāġh

tab tak mire qalam ne faqat raushnī likhī

jab tak hathelī par mirī likhtā rahā charāġh

pahlū meñ us ke kal tirī tasvīr thī paḌī

ġhazleñ tire jamāl pe kahtā rahā charāġh

āñkheñ mirī bhī surḳh thiiñ vo bhī bujhā bujhā

yuuñ mere saath saath hī rotā rahā charāġh

maiñ us ke paas baiTh ke kahtā rahā ġhazal

aur puure inhimāk se suntā rahā charāġh

kal us ke saath merī baḌī guftugū huī

merī kahānī sun ke sisaktā rahā charāġh

tark-e-ta.alluqāt kā mīsāq jab huā

mere aur us ke darmiyāñ baiThā rahā charāġh

jaane havā ne kyā kahā kānoñ meñ us ke kal

'dānish' tamām raat machaltā rahā charāġh

mujh ko thapak thapak ke sulata raha charagh

pahlu mein raat bhar mere baiTha raha charagh

kahta raha ki raat ye kitni hasin hai

tira-shabi ka girya bhi karta raha charagh

suraj ka ek bar faqat nam kya liya

mujh se tamam raat hi laDta raha charagh

us ko meri shikast ki itni KHushi hui

hathon pe hath mar ke hansta raha charagh

main us ki zard lau mein KHuda dekhta raha

kamre mein raat bhar mere jalta raha charagh

tab tak mere qalam ne faqat raushni likhi

jab tak hatheli par meri likhta raha charagh

pahlu mein us ke kal teri taswir thi paDi

ghazlen tere jamal pe kahta raha charagh

aankhen meri bhi surKH thin wo bhi bujha bujha

yun mere sath sath hi rota raha charagh

main us ke pas baiTh ke kahta raha ghazal

aur pure inhimak se sunta raha charagh

kal us ke sath meri baDi guftugu hui

meri kahani sun ke sisakta raha charagh

tark-e-talluqat ka misaq jab hua

mere aur us ke darmiyan baiTha raha charagh

jaane hawa ne kya kaha kanon mein us ke kal

'danish' tamam raat machalta raha charagh