mujhko tere suluk se koi gila na tha

mujh ko tire sulūk se koī gila na thā

zahr ab pī rahā thā magar lab-kushā na thā

kāñToñ se jism chhalnī hai merā isī liye

phūloñ se pyaar karne kā kuchh tajraba na thā

lākhoñ tamāsh-bīn haiñ aur ham salīb par

ik vaqt vo thā koī hameñ dekhtā na thā

kyā jaane us kī aañkh meñ kyuuñ ashk aa ga.e

chehre pe mere kuchh bhī to likkhā huā na thā

duniyā samajh na pā.egī majbūriyāñ tirī

mujh ko to hai yaqīn ki tū bevafā na thā

kyā tū ne chhoḌ rakkhā hai zulfeñ sañvārnā

itnā to pahle maiñ kabhī uljhā huā na thā

ġhurbat kī chāñdnī ne dikhā.e the rāste

ham ko kisī charāġh se koī gila na thā

yādoñ ne dastakeñ to bahut baar diiñ 'shakīl'

lekin kisī ke dil kā darīcha khulā na thā

mujh ko tere suluk se koi gila na tha

zahr ab pi raha tha magar lab-kusha na tha

kanTon se jism chhalni hai mera isi liye

phulon se pyar karne ka kuchh tajraba na tha

lakhon tamash-bin hain aur hum salib par

ek waqt wo tha koi hamein dekhta na tha

kya jaane us ki aankh mein kyun ashk aa gae

chehre pe mere kuchh bhi to likkha hua na tha

duniya samajh na paegi majburiyan teri

mujh ko to hai yaqin ki tu bewafa na tha

kya tu ne chhoD rakkha hai zulfen sanwarna

itna to pahle main kabhi uljha hua na tha

ghurbat ki chandni ne dikhae the raste

hum ko kisi charagh se koi gila na tha

yaadon ne dastaken to bahut bar din 'shakil'

lekin kisi ke dil ka daricha khula na tha