mujh mein ab nahin baqi hausla bichhaDne ka

mujh meñ ab nahīñ baaqī hausla bichhaḌne kā

multajī huuñ denā mat indiya bichhaḌne kā

is se baḌh ke kyā hotā zindagī ke dāman meñ

ek ġham hai hone kā dūsrā bichhaḌne kā

pyaar aur tavaqqo.a ke silsile na baḌh jaa.eñ

is jagah munāsib hai sochnā bichhaḌne kā

aap kī suhūlat bas ham aziiz rakhte haiñ

maañg lo atā hogā rāsta bichhaḌne kā

har milan judā.ī kī avvalīn manzil hai

vasl hī se juḌtā hai silsila bichhaḌne kā

be-sukūn shāmoñ se be-yaqīn sub.hoñ tak

tai huā hai āḳhir har marhala bichhaḌne kā

bhāñp to ga.e the ham saath aarzī hai ye

jān-e-man magar phir bhī dukh huā bichhaḌne kā

mujh mein ab nahin baqi hausla bichhaDne ka

multaji hun dena mat indiya bichhaDne ka

is se baDh ke kya hota zindagi ke daman mein

ek gham hai hone ka dusra bichhaDne ka

pyar aur tawaqqoa ke silsile na baDh jaen

is jagah munasib hai sochna bichhaDne ka

aap ki suhulat bas hum aziz rakhte hain

mang lo ata hoga rasta bichhaDne ka

har milan judai ki awwalin manzil hai

wasl hi se juDta hai silsila bichhaDne ka

be-sukun shamon se be-yaqin subhon tak

tai hua hai aaKHir har marhala bichhaDne ka

bhanp to gae the hum sath aarzi hai ye

jaan-e-man magar phir bhi dukh hua bichhaDne ka