mujh mein bahti hai pagal hawa kaun si

mujh meñ bahtī hai pāgal havā kaun sī

kaun sī hai ye bād-e-sabā kaun sī

tujh ko samjhā thā maiñ manzil-e-justujū

ye bulātī hai mujh ko sadā kaun sī

dil baḌī be-niyāzī se uTh kar chalā

hai tire ġham kī ye intihā kaun sī

maiñ ki lauTī huī apnī āvāz huuñ

ab bikhartī hai mujh meñ sadā kaun sī

dekh kar tujh ko bujhte diye jal uThe

dil ke bujhne kī hai ye adā kaun sī

ek ik ruḳh se zāhir hai ab be-ruḳhī

is meñ hai sirf terī ḳhatā kaun sī

apnī āvāz par aa rahā hai yaqīñ

kaam aa.ī ye mere du'ā kaun sī

mujh ko har ik nazar meñ tamāshā kiyā

jurm kyā thā mirā dī sazā kaun sī

mujh mein bahti hai pagal hawa kaun si

kaun si hai ye baad-e-saba kaun si

tujh ko samjha tha main manzil-e-justuju

ye bulati hai mujh ko sada kaun si

dil baDi be-niyazi se uTh kar chala

hai tere gham ki ye intiha kaun si

main ki lauTi hui apni aawaz hun

ab bikharti hai mujh mein sada kaun si

dekh kar tujh ko bujhte diye jal uThe

dil ke bujhne ki hai ye ada kaun si

ek ek ruKH se zahir hai ab be-ruKHi

is mein hai sirf teri KHata kaun si

apni aawaz par aa raha hai yaqin

kaam aai ye mere du'a kaun si

mujh ko har ek nazar mein tamasha kiya

jurm kya tha mera di saza kaun si