mujh pe aisa koi sher nazil na ho

mujh pe aisā koī sher nāzil na ho

jis kī hiddat mire ḳhuuñ meñ shāmil na ho

fikr aise muhīt-e-suḳhan kī karo

jis kī amvāj kā koī sāhil na ho

aaj ik bint-e-maryam hai āġhosh meñ

mujh pe ai rūh-e-quds aaj nāzil na ho

be-muhābā mile hijr ho bā-visāl

koī dīvār raste meñ maa.il na ho

shāḳh par hai gumāñ gul se andesha hai

ye bhī ḳhanjar na ho ye bhī qātil na ho

kārvān-e-junūñ de rahā hai sadā

jaañ ho pyārī jise ham meñ shāmil na ho

kaash vo vaqt bhī aa.e duniyā meñ jab

zar pukāre magar koī saa.il na ho

merī tanhā.ī ko merā maqsūm kar

merī manzil zamāne kī manzil na ho

hukm de jān-e-'sahbā' na.ī fikr kā

ye ġhazal bhī agar tere qābil na ho

mujh pe aisa koi sher nazil na ho

jis ki hiddat mere KHun mein shamil na ho

fikr aise muhit-e-suKHan ki karo

jis ki amwaj ka koi sahil na ho

aaj ek bint-e-maryam hai aaghosh mein

mujh pe ai ruh-e-quds aaj nazil na ho

be-muhaba mile hijr ho ba-visal

koi diwar raste mein mail na ho

shaKH par hai guman gul se andesha hai

ye bhi KHanjar na ho ye bhi qatil na ho

karwan-e-junun de raha hai sada

jaan ho pyari jise hum mein shamil na ho

kash wo waqt bhi aae duniya mein jab

zar pukare magar koi sail na ho

meri tanhai ko mera maqsum kar

meri manzil zamane ki manzil na ho

hukm de jaan-e-'sahba' nai fikr ka

ye ghazal bhi agar tere qabil na ho