mujh pe koi mehrban hai aaj-kal

mujh pe koī mehrbāñ hai āj-kal

ab sukūn-e-dil kahāñ hai āj-kal

dil meñ koī mehmāñ hai āj-kal

aarzū phir se javāñ hai āj-kal

baat aglī sī kahāñ hai āj-kal

ab takalluf darmiyāñ hai āj-kal

tum nahīñ to lutf-e-aish-e-zīst kyā

zindagī bār-e-garāñ hai āj-kal

jo nazar thī dāvat-e-lutf-o-vafā

jaane kyoñ tīr-o-kamāñ hai aaj kal

āñsuoñ ko zabt kar bhī luuñ magar

dil to majbūr-e-fuġhāñ hai āj-kal

jis jagah sajde kiye the ishq ne

husn nam-dīda vahāñ hai āj-kal

iltifāt-e-husn-o-kaif-e-vasl-e-dost

ek bhūlī dāstāñ hai āj-kal

barq-o-bārāñ sab isī ke vāste

kyā yahī ik āshiyāñ hai āj-kal

hai farishtoñ kā pahuñchnā bhī muhāl

ik dil-e-nādāñ jahāñ hai āj-kal

rāz-e-dil maiñ ne chhupāyā bhī magar

un kī nazroñ se ayaañ hai āj-kal

kar leñ ab ahl-e-chaman ḳhud intizām

mushkiloñ meñ bāġhbāñ hai āj-kal

ik dil-e-pur-soz-e-'mauj' aur bahr-e-ishq

aag paanī meñ ravāñ hai āj-kal

mujh pe koi mehrban hai aaj-kal

ab sukun-e-dil kahan hai aaj-kal

dil mein koi mehman hai aaj-kal

aarzu phir se jawan hai aaj-kal

baat agli si kahan hai aaj-kal

ab takalluf darmiyan hai aaj-kal

tum nahin to lutf-e-aish-e-zist kya

zindagi bar-e-garan hai aaj-kal

jo nazar thi dawat-e-lutf-o-wafa

jaane kyon tir-o-kaman hai aaj kal

aansuon ko zabt kar bhi lun magar

dil to majbur-e-fughan hai aaj-kal

jis jagah sajde kiye the ishq ne

husn nam-dida wahan hai aaj-kal

iltifat-e-husn-o-kaif-e-wasl-e-dost

ek bhuli dastan hai aaj-kal

barq-o-baran sab isi ke waste

kya yahi ek aashiyan hai aaj-kal

hai farishton ka pahunchna bhi muhaal

ek dil-e-nadan jahan hai aaj-kal

raaz-e-dil main ne chhupaya bhi magar

un ki nazron se ayan hai aaj-kal

kar len ab ahl-e-chaman KHud intizam

mushkilon mein baghban hai aaj-kal

ek dil-e-pur-soz-e-'mauj' aur bahr-e-ishq

aag pani mein rawan hai aaj-kal