mujh sa betab howe jab koi

mujh sā betāb hove jab koī

be-qarārī ko jaane tab koī

haañ ḳhudā maġhfirat kare us ko

sabr marhūm thā ajab koī

jaan de go masīh par us se

baat kahte haiñ tere lab koī

ba.ad mere hī ho gayā sunsān

sone paayā thā varna kab koī

us ke kūche meñ hashr the mujh tak

āh-o-nāla kare na ab koī

ek ġham meñ huuñ maiñ hī aalam meñ

yuuñ to shādāñ hai aur sab koī

nā-samajh yuuñ ḳhafā bhī hotā hai

mujh se muḳhlis se be-sabab koī

aur mahzūñ bhī ham sune the vale

'mīr' sā ho sake hai kab koī

ki talaffuz tarab kā sun ke kahe

shaḳhs hogā kahīñ tarab koī

mujh sa betab howe jab koi

be-qarari ko jaane tab koi

han KHuda maghfirat kare us ko

sabr marhum tha ajab koi

jaan de go masih par us se

baat kahte hain tere lab koi

baad mere hi ho gaya sunsan

sone paya tha warna kab koi

us ke kuche mein hashr the mujh tak

aah-o-nala kare na ab koi

ek gham mein hun main hi aalam mein

yun to shadan hai aur sab koi

na-samajh yun KHafa bhi hota hai

mujh se muKHlis se be-sabab koi

aur mahzun bhi hum sune the wale

'mir' sa ho sake hai kab koi

ki talaffuz tarab ka sun ke kahe

shaKHs hoga kahin tarab koi