mujhse milta tha wo barsat mein jugnu ki tarah

mujh se miltā thā vo barsāt meñ jugnū kī tarah

bujh bhī jaatā thā mire haat meñ jugnū kī tarah

maiñ ne din meñ to use der talak DhūñDā thā

vo nazar aaya mujhe raat meñ jugnū kī tarah

TimTimāne kī adā us kī chamakne kā fusūñ

mujh ko bhaTkā.e ḳhayālāt meñ jugnū kī tarah

kyoñ ujāloñ meñ hai be-nūr añdheroñ kī ziyā

yuuñ hī uljhāyā savālāt meñ jugnū kī tarah

tū bhī bujh jaa.e tamāzat meñ na din kī ab ke

chhūī-mūī hai mulāqāt meñ jugnū kī tarah

zindagī merī bahut kam sahī nāyāb to hai

maiñ ki jiitā huuñ mirī zaat meñ jugnū kī tarah

harz-e-jāñ maiñ ne banāyā hai tujhe tīra-shabī

maiñ nahīñ rahtā tirī ghaat meñ jugnū kī tarah

dekhiye kab mujhe miltī hai ujāloñ se najāt

abhī Duubā huuñ maiñ zulmāt meñ jugnū kī tarah

kaam ā.ūñgā maiñ har shai ke ‘muzaffar-īraj'

tū bhī rah apnī hī auqāt meñ jugnū kī tarah

mujh se milta tha wo barsat mein jugnu ki tarah

bujh bhi jata tha mere hat mein jugnu ki tarah

main ne din mein to use der talak DhunDa tha

wo nazar aaya mujhe raat mein jugnu ki tarah

TimTimane ki ada us ki chamakne ka fusun

mujh ko bhaTkae KHayalat mein jugnu ki tarah

kyon ujalon mein hai be-nur andheron ki ziya

yun hi uljhaya sawalat mein jugnu ki tarah

tu bhi bujh jae tamazat mein na din ki ab ke

chhui-mui hai mulaqat mein jugnu ki tarah

zindagi meri bahut kam sahi nayab to hai

main ki jita hun meri zat mein jugnu ki tarah

harz-e-jaan main ne banaya hai tujhe tira-shabi

main nahin rahta teri ghat mein jugnu ki tarah

dekhiye kab mujhe milti hai ujalon se najat

abhi Duba hun main zulmat mein jugnu ki tarah

kaam aaunga main har shai ke ‘muzaffar-iraj'

tu bhi rah apni hi auqat mein jugnu ki tarah