mujhse shakeb-e-qalb ka saman na ho saka

mujh se shakeb-e-qalb kā sāmāñ na ho sakā

us par bhī dil kā raaz numāyāñ na ho sakā

ye dil miTā miTā sā ye sho.ala bujhā bujhā

ek āftāb se bhī farozāñ na ho sakā

suljhā.e terī zulf-e-pareshāñ ke bal magar

qaa.em nizām-e-ālam-e-imkāñ na ho sakā

tujh ko tire shabāb ko rañg-e-baqā diyā

apnī hī ziist kā koī sāmāñ na ho sakā

chhiḌkī tire tabassum pinhāñ kī chāñdnī

ḳhalvat kā rañg phir bhī daraḳhshāñ na ho sakā

baiThā rahā jo gesu-e-mushkīñ ke saa.e meñ

vo pā.emāl gardish-e-daurāñ na ho sakā

ā.īna aks-e-jalva se TuuTā nahīñ kabhī

dil yūrish-e-jamāl se hairāñ na ho sakā

nashshe meñ tere paañv pe girtā jabīñ ke bal

'maḳhmūr' itnā kaif-ba-dāmāñ na ho sakā

mujh se shakeb-e-qalb ka saman na ho saka

us par bhi dil ka raaz numayan na ho saka

ye dil miTa miTa sa ye shoala bujha bujha

ek aaftab se bhi farozan na ho saka

suljhae teri zulf-e-pareshan ke bal magar

qaem nizam-e-alam-e-imkan na ho saka

tujh ko tere shabab ko rang-e-baqa diya

apni hi zist ka koi saman na ho saka

chhiDki tere tabassum pinhan ki chandni

KHalwat ka rang phir bhi daraKHshan na ho saka

baiTha raha jo gesu-e-mushkin ke sae mein

wo paemal gardish-e-dauran na ho saka

aaina aks-e-jalwa se TuTa nahin kabhi

dil yurish-e-jamal se hairan na ho saka

nashshe mein tere panw pe girta jabin ke bal

'maKHmur' itna kaif-ba-daman na ho saka