mujh sin gham dast-o-gareban na hua tha so hua

mujh siiñ ġham dast-o-garebāñ na huā thā so huā

chaak siine kā numāyāñ na huā thā so huā

ab talak mujh kuuñ kisī shaḳhs ke chehra kā ḳhayāl

sūrat-e-ā.ina-e-jāñ na huā thā so huā

saf-e-ushshāq meñ koī sānī-e-majnūñ mujh sā

vahshī-e-koh-o-bayābāñ na huā thā so huā

ashk ole ho baraste haiñ mire dāman meñ

ye varaq nuqra-e-afshāñ na huā thā so huā

ḳhanjar-e-ishq ne ehsān kiyā sar pe mire

jaan kandan kabhī āsāñ na huā thā so huā

qibla-rū rahm kiyā mujh pe ḳhat-āġhāzī meñ

kāfir-e-hind musalmāñ na huā thā so huā

āh-e-sozāñ siiñ mire dāman-e-sahrā meñ 'sirāj'

qabr-e-majnūñ pe charāġhāñ na huā thā so huā

mujh sin gham dast-o-gareban na hua tha so hua

chaak sine ka numayan na hua tha so hua

ab talak mujh kun kisi shaKHs ke chehra ka KHayal

surat-e-aina-e-jaan na hua tha so hua

saf-e-ushshaq mein koi sani-e-majnun mujh sa

wahshi-e-koh-o-bayaban na hua tha so hua

ashk ole ho baraste hain mere daman mein

ye waraq nuqra-e-afshan na hua tha so hua

KHanjar-e-ishq ne ehsan kiya sar pe mere

jaan kandan kabhi aasan na hua tha so hua

qibla-ru rahm kiya mujh pe KHat-aghazi mein

kafir-e-hind musalman na hua tha so hua

aah-e-sozan sin mere daman-e-sahra mein 'siraj'

qabr-e-majnun pe charaghan na hua tha so hua