mujhe ai ham-nafas andesha-e-barq-o-KHizan kyun ho

mujhe ai ham-nafas andesha-e-barq-o-ḳhizāñ kyuuñ ho

mirī parvāz mahdūd-e-fazā-e-gulsitāñ kyuuñ ho

junūñ kī vus.atoñ par tañg hai arsa do-ālam kā

jo sajda ho to phir sajda ba-qaid-e-āstāñ kyuuñ ho

mire kaam aa ga.ī āḳhir mirī kāshāna-bar-doshī

sharār-o-barq kī zad par bhī merā āshiyāñ kyuuñ ho

ġham-e-dil bhī jo rusvā-e-mazāq-e-ām ho jaa.e

to phir in dāstānoñ meñ hamārī dāstāñ kyuuñ ho

pyāloñ kī khanak se bhī jahāñ dil TuuT jaate haiñ

vahāñ chhāyā huā har bazm par ḳhvāb-e-girāñ kyuuñ ho

na maiñ jāñ-dāda-e-sāqī na maiñ vārafta-e-mutrib

agar mahfil se uTh jā.ūñ to mahfil bad-gumāñ kyuuñ ho

maiñ jis aalam meñ huuñ apnī jagah ai 'shor' tanhā huuñ

judā ho jis kī manzil vo rahīn-e-kārvāñ kyuuñ ho

mujhe ai ham-nafas andesha-e-barq-o-KHizan kyun ho

meri parwaz mahdud-e-faza-e-gulsitan kyun ho

junun ki wusaton par tang hai arsa do-alam ka

jo sajda ho to phir sajda ba-qaid-e-astan kyun ho

mere kaam aa gai aaKHir meri kashana-bar-doshi

sharar-o-barq ki zad par bhi mera aashiyan kyun ho

gham-e-dil bhi jo ruswa-e-mazaq-e-am ho jae

to phir in dastanon mein hamari dastan kyun ho

pyalon ki khanak se bhi jahan dil TuT jate hain

wahan chhaya hua har bazm par KHwab-e-giran kyun ho

na main jaan-dada-e-saqi na main warafta-e-mutrib

agar mahfil se uTh jaun to mahfil bad-guman kyun ho

main jis aalam mein hun apni jagah ai 'shor' tanha hun

juda ho jis ki manzil wo rahin-e-karwan kyun ho