mujhe Dar hai hanste hanste kahin ro na de zamana

mujhe Dar hai hañste hañste kahīñ ro na de zamāna

jo badal badal ke unvāñ maiñ kahūñ vahī fasāna

ye bahār ye ghaTā.eñ ye shabāb kā zamāna

mujhe ab to diije nāseh na salāh-e-muḳhlisāna

jo ho jazb jazb-e-kāmil jo ho shauq-e-vālihāna

to hai bandagī ko lāzim na jabīñ na āstāna

hai mujhe malāl is kā ki badal ga.iiñ vo nazreñ

mujhe is kā ġham nahīñ hai ki badal gayā zamāna

maiñ kab aayā jā.ūñgā kab mujhe kuchh ḳhabar nahīñ hai

mirī ibtidā fasāna mirī intihā fasāna

mirā haal dekhte hī kī har ik ne mai se tauba

mirī laġhzishoñ ke sadqe meñ sambhal gayā zamāna

sar-e-tūr kyoñ maiñ jā.ūñ bhalā us ke dekhne ko

vo har ek jā ayaañ hai jo nazar ho ārifāna

kabhī saath saath chalnā na huā nasīb mujh ko

kabhī baḌh gayā maiñ aage kabhī baḌh gayā zamāna

are aap kī to āñkhoñ meñ jhalak rahe haiñ aañsū

bas ab aap sun chuke aur maiñ sunā chukā fasāna

mirī har ġhazal meñ pinhāñ mirī dil kī dhaḌkaneñ haiñ

magar ai 'sa.īd' us ko na samajh sakā zamāna

mujhe Dar hai hanste hanste kahin ro na de zamana

jo badal badal ke unwan main kahun wahi fasana

ye bahaar ye ghaTaen ye shabab ka zamana

mujhe ab to dije naseh na salah-e-muKHlisana

jo ho jazb jazb-e-kaamil jo ho shauq-e-walihana

to hai bandagi ko lazim na jabin na aastana

hai mujhe malal is ka ki badal gain wo nazren

mujhe is ka gham nahin hai ki badal gaya zamana

main kab aaya jaunga kab mujhe kuchh KHabar nahin hai

meri ibtida fasana meri intiha fasana

mera haal dekhte hi ki har ek ne mai se tauba

meri laghzishon ke sadqe mein sambhal gaya zamana

sar-e-tur kyon main jaun bhala us ke dekhne ko

wo har ek ja ayan hai jo nazar ho aarifana

kabhi sath sath chalna na hua nasib mujh ko

kabhi baDh gaya main aage kabhi baDh gaya zamana

are aap ki to aankhon mein jhalak rahe hain aansu

bas ab aap sun chuke aur main suna chuka fasana

meri har ghazal mein pinhan meri dil ki dhaDkanen hain

magar ai 'said' us ko na samajh saka zamana