mujhe do rang bharne ki ijazat main banata hun

mujhe do rang bharne kī ijāzat maiñ banātā huuñ

jahāñ bantī nahīñ hai koī sūrat maiñ banātā huuñ

tumheñ to Thiik se barbād karnā bhī nahīñ aatā

chalo pīchhe haTo apnī ye hālat maiñ banātā huuñ

ta'alluq meñ koī raḳhna banānā saḳht-jānī hai

tire hāthoñ kī narmāhaT salāmat maiñ banātā huuñ

tire hisse meñ pahle ashk se āġhāz karnā hai

baqāyā kār-e-girya ko nihāyat maiñ banātā huuñ

mirī hamdam ko shikva hai ki maiñ kuchh bhī nahīñ kartā

mire bachche samajhte haiñ ki qismat maiñ banātā huuñ

ghaḌī kī sūiyāñ tartīb meñ Tik-Tik banātī haiñ

magar ye jāgne sone kī aadat maiñ banātā huuñ

mujhe do rang bharne ki ijazat main banata hun

jahan banti nahin hai koi surat main banata hun

tumhein to Thik se barbaad karna bhi nahin aata

chalo pichhe haTo apni ye haalat main banata hun

ta'alluq mein koi raKHna banana saKHt-jaani hai

tere hathon ki narmahaT salamat main banata hun

tere hisse mein pahle ashk se aaghaz karna hai

baqaya kar-e-girya ko nihayat main banata hun

meri hamdam ko shikwa hai ki main kuchh bhi nahin karta

mere bachche samajhte hain ki qismat main banata hun

ghaDi ki suiyan tartib mein Tik-Tik banati hain

magar ye jagne sone ki aadat main banata hun