mujhe gharaz hai sitare na mahtab ke sath

mujhe ġharaz hai sitāre na māhtāb ke saath

chamak rahā hai ye dil puurī āb-o-tāb ke saath

napī-tulī sī mohabbat lagā bañdhā sā karam

nibhā rahe ho ta.alluq baḌe hisāb ke saath

maiñ is liye nahīñ thaktā tire ta.āqub se

mujhe yaqīñ hai ki paanī bhī hai sarāb ke saath

savāl-e-vasl pe inkār karne vaale sun

savāl ḳhatm nahīñ hogā is javāb ke saath

ḳhamosh jhiil ke paanī meñ vo udāsī thī

ki dil bhī Duub gayā raat māhtāb ke saath

jatā diyā ki mohabbat meñ ġham bhī hote haiñ

diyā gulāb to kāñTe bhī the gulāb ke saath

maiñ le uḌūñgā tire ḳhadd-o-ḳhāl se ta.abīr

na dekh merī taraf chashm-e-nīm-ḳhvāb ke saath

are ye sirf bahāna hai baat karne kā

mirī majāl ki jhagḌā karūñ janāb ke saath

visāl-o-hijr kī sarhad pe jhuTpuTe meñ kahīñ

vo be-hijāb huā thā magar hijāb ke saath

shikasta aa.ina dekhā phir apnā dil dekhā

dikhā.ī dī mujhe tābīr-e-ḳhvāb ḳhvāb ke saath

vahāñ milūñgā jahāñ donoñ vaqt milte haiñ

maiñ kam-nasīb tire jaise kāmyāb ke saath

dayār-e-hijr ke roza-guzār chāhte haiñ

ki roza kholeñ tire aur sharāb-e-nāb ke saath

tum achchhī dost ho so merā mashvara ye hai

milā-julā na karo 'fāris'-e-ḳharāb ke saath

mujhe gharaz hai sitare na mahtab ke sath

chamak raha hai ye dil puri aab-o-tab ke sath

napi-tuli si mohabbat laga bandha sa karam

nibha rahe ho talluq baDe hisab ke sath

main is liye nahin thakta tere taaqub se

mujhe yaqin hai ki pani bhi hai sarab ke sath

sawal-e-wasl pe inkar karne wale sun

sawal KHatm nahin hoga is jawab ke sath

KHamosh jhil ke pani mein wo udasi thi

ki dil bhi Dub gaya raat mahtab ke sath

jata diya ki mohabbat mein gham bhi hote hain

diya gulab to kanTe bhi the gulab ke sath

main le uDunga tere KHadd-o-KHal se tabir

na dekh meri taraf chashm-e-nim-KHwab ke sath

are ye sirf bahana hai baat karne ka

meri majal ki jhagDa karun janab ke sath

visal-o-hijr ki sarhad pe jhuTpuTe mein kahin

wo be-hijab hua tha magar hijab ke sath

shikasta aaina dekha phir apna dil dekha

dikhai di mujhe tabir-e-KHwab KHwab ke sath

wahan milunga jahan donon waqt milte hain

main kam-nasib tere jaise kaamyab ke sath

dayar-e-hijr ke roza-guzar chahte hain

ki roza kholen tere aur sharab-e-nab ke sath

tum achchhi dost ho so mera mashwara ye hai

mila-jula na karo 'faris'-e-KHarab ke sath