mujhe hayat ke sanchon mein Dhaalne wale

mujhe hayāt ke sāñchoñ meñ Dhālne vaale

kahāñ ga.e vo samundar khañgālne vaale

luḌhak rahā huuñ Dhalānoñ se pyaar kī maiñ to

na aa.eñ raah meñ mujh ko sañbhālne vaale

hamāre shauq-e-farāvāñ ne Das liyā ham ko

ki āstīñ meñ the ham saañp pālne vaale

havā meñ pheñk na mujh ko samajh ke khel koī

tujhī ko aa ke lagūñgā uchhālne vaale

zarā sā kaam huuñ maiñ phir bhī nā-mukammal huuñ

yahāñ mile haiñ sabhī mujh ko Tālne vaale

kuaañ havas kā thā gahrā kuchh is qadar 'aḳhtar'

ki ḳhud hī gir ga.e mujh ko nikālne vaale

mujhe hayat ke sanchon mein Dhaalne wale

kahan gae wo samundar khangalne wale

luDhak raha hun Dhalanon se pyar ki main to

na aaen rah mein mujh ko sanbhaalne wale

hamare shauq-e-farawan ne Das liya hum ko

ki aastin mein the hum sanp palne wale

hawa mein phenk na mujh ko samajh ke khel koi

tujhi ko aa ke lagunga uchhaalne wale

zara sa kaam hun main phir bhi na-mukammal hun

yahan mile hain sabhi mujh ko Talne wale

kuan hawas ka tha gahra kuchh is qadar 'aKHtar'

ki KHud hi gir gae mujh ko nikalne wale