mujhe ho na phir nadamat kahin arz-e-haal kar ke

mujhe ho na phir nadāmat kahīñ arz-e-hāl kar ke

maiñ ḳhamosh rah gayā huuñ yahī ehtimāl kar ke

na rahe koī bhī shikva mujhe phir tire karam kā

jo atā mujhe ho saaqī to ho ye ḳhayāl kar ke

mujhe aap ne jo dekhā thā vo ittifāq lekin

mire dostoñ ne chheḌā mujhe kyā ḳhayāl kar ke

mirī aarzū ko Taalā mujhe uljhanoñ meñ Daalā

kabhī kuchh savāl kar ke kabhī kuchh savāl kar ke

koī ġham agar nahīñ hai to vo kyā sabab hai jis ne

ai 'amīr' rakh diyā hai tujhe ḳhasta-hāl kar ke

mujhe ho na phir nadamat kahin arz-e-haal kar ke

main KHamosh rah gaya hun yahi ehtimal kar ke

na rahe koi bhi shikwa mujhe phir tere karam ka

jo ata mujhe ho saqi to ho ye KHayal kar ke

mujhe aap ne jo dekha tha wo ittifaq lekin

mere doston ne chheDa mujhe kya KHayal kar ke

meri aarzu ko Tala mujhe uljhanon mein Dala

kabhi kuchh sawal kar ke kabhi kuchh sawal kar ke

koi gham agar nahin hai to wo kya sabab hai jis ne

ai 'amir' rakh diya hai tujhe KHasta-haal kar ke