mujhe is shahr ki aab-o-hawa achchhi nahin lagti

mujhe is shahr kī āb-o-havā achchhī nahīñ lagtī

musalsal ḳhud-farebī kī qabā achchhī nahīñ lagtī

ilāhī ye maraz kaisā lagā mujh ko na jaane kyoñ

duā achchhī nahīñ lagtī davā achchhī nahīñ lagtī

ḳhushī kī bhī ḳhabar se ab to dilchaspī nahīñ mujh ko

ki ab ai zindagī tujh se vafā achchhī nahīñ lagtī

jahāñ ke sāmne ham ko na tum pahchān paate ho

tumhārī ye adā ham ko zarā achchhī nahīñ lagtī

maiñ aisī bazm-e-shor-o-ġhul se niklā huuñ ki ab mujh ko

koī aahaT kisī kī bhī sadā achchhī nahīñ lagtī

maiñ kahnā chāhtā huuñ un se lekin kah nahīñ paatā

ki mujh ko un kī ḳhū un kī anā achchhī nahīñ lagtī

duā.eñ aur fariyādeñ falak se lauT aatī haiñ

ḳhudā ko ġhāliban merī razā achchhī nahīñ lagtī

tū kyoñ kahtā hai sajdoñ meñ mujhe rab umr lambī de

mujhe tere laboñ par ye duā achchhī nahīñ lagtī

kabhī terī sabhī nādāniyoñ par jaan dete the

magar ab to tirī koī ḳhatā achchhī nahīñ lagtī

mujhe tum chhoḌ do is haal par ye haal achchhā hai

paḌī hai dard kī ḳhū ab shifā achchhī nahīñ lagtī

ujāloñ se to ab 'afrañg' kyā ummīd kījegā

magar ye tīrgī ham se ḳhafā achchhī nahīñ lagtī

mujhe is shahr ki aab-o-hawa achchhi nahin lagti

musalsal KHud-farebi ki qaba achchhi nahin lagti

ilahi ye maraz kaisa laga mujh ko na jaane kyon

dua achchhi nahin lagti dawa achchhi nahin lagti

KHushi ki bhi KHabar se ab to dilchaspi nahin mujh ko

ki ab ai zindagi tujh se wafa achchhi nahin lagti

jahan ke samne hum ko na tum pahchan pate ho

tumhaari ye ada hum ko zara achchhi nahin lagti

main aisi bazm-e-shor-o-ghul se nikla hun ki ab mujh ko

koi aahaT kisi ki bhi sada achchhi nahin lagti

main kahna chahta hun un se lekin kah nahin pata

ki mujh ko un ki KHu un ki ana achchhi nahin lagti

duaen aur fariyaaden falak se lauT aati hain

KHuda ko ghaaliban meri raza achchhi nahin lagti

tu kyon kahta hai sajdon mein mujhe rab umr lambi de

mujhe tere labon par ye dua achchhi nahin lagti

kabhi teri sabhi nadaniyon par jaan dete the

magar ab to teri koi KHata achchhi nahin lagti

mujhe tum chhoD do is haal par ye haal achchha hai

paDi hai dard ki KHu ab shifa achchhi nahin lagti

ujalon se to ab 'afrang' kya ummid kijega

magar ye tirgi hum se KHafa achchhi nahin lagti