mujhe kal mila jo sar-e-chaman wo tamam naKHl-e-shabab sa

mujhe kal milā jo sar-e-chaman vo tamām naḳhl-e-shabāb sā

koī baat us kī sharāb sī koī harf us kā gulāb sā

jise zindagī na bhulā sake jise maut bhī na miTā sake

vahī maiñ huuñ 'ġhālib'-e-ḳhasta-jāñ vahī 'mīr'-e-ḳhāna-ḳharāb sā

vo tamām gard fanā huī mire jism-o-jāñ pe jo baar thī

tirī ik nazar meñ simaT gayā mire sar pe thā jo azaab sā

vahī ek manzar-e-ḳhush-adā kahīñ naqsh meñ kahīñ rañg meñ

vahī us kī zulf ġhazal-numā vahī us kā chehra kitāb sā

koī baat us meñ zarūr thī jo mire ḳhayāl meñ rah ga.ī

use kyuuñ fareb-e-nazar kahūñ jise maiñ ne dekhā thā ḳhvāb sā

dil-e-nā-subūr ke vāste koī naqsh-e-nāz bachā nahīñ

ye jahān-e-tāza ye asr-e-nau jise dekhiye tah-e-āb sā

ajab ittifāq thā 'nāmī' ye ki hue baham bhī to kyā hue

na shikasta koī mirī tarah na girafta koī janāb sā

mujhe kal mila jo sar-e-chaman wo tamam naKHl-e-shabab sa

koi baat us ki sharab si koi harf us ka gulab sa

jise zindagi na bhula sake jise maut bhi na miTa sake

wahi main hun 'ghaalib'-e-KHasta-jaan wahi 'mir'-e-KHana-KHarab sa

wo tamam gard fana hui mere jism-o-jaan pe jo bar thi

teri ek nazar mein simaT gaya mere sar pe tha jo azab sa

wahi ek manzar-e-KHush-ada kahin naqsh mein kahin rang mein

wahi us ki zulf ghazal-numa wahi us ka chehra kitab sa

koi baat us mein zarur thi jo mere KHayal mein rah gai

use kyun fareb-e-nazar kahun jise main ne dekha tha KHwab sa

dil-e-na-subur ke waste koi naqsh-e-naz bacha nahin

ye jahan-e-taza ye asr-e-nau jise dekhiye tah-e-ab sa

ajab ittifaq tha 'nami' ye ki hue baham bhi to kya hue

na shikasta koi meri tarah na girafta koi janab sa