mujhe na DhunD chaman ki hasin bahaaron mein

mujhe na DhūñD chaman kī hasīñ bahāroñ meñ

safīr-e-dasht huuñ rahtā huuñ ḳhārzāroñ meñ

har ek baat kī tashrīh to nahīñ hotī

kabhī to baat ko samjhā karo ishāroñ meñ

vo kaisā josh thā bachchoñ meñ bhī shahādat kā

uchak rahe the jo panjoñ ke bal qatāroñ meñ

ḳhushā ki merī basīrat abhī salāmat hai

parakh rahā huuñ nagīnoñ ko sang-pāroñ meñ

bajā ki tujh ko hai shauq-e-shanāvarī lekin

hai farq jhiil nadī bahr ke kināroñ meñ

use ye ḳhauf ki maiñ bā-asar na ho jā.ūñ

vo merā naam bhī letā nahīñ ishāroñ meñ

riyā-pasand mizājoñ meñ diin kyā 'qaisar'

nahīñ hai jauhar-e-īmāñ hī dīn-dāroñ meñ

mujhe na DhunD chaman ki hasin bahaaron mein

safir-e-dasht hun rahta hun KHarzaron mein

har ek baat ki tashrih to nahin hoti

kabhi to baat ko samjha karo ishaaron mein

wo kaisa josh tha bachchon mein bhi shahadat ka

uchak rahe the jo panjon ke bal qataron mein

KHusha ki meri basirat abhi salamat hai

parakh raha hun naginon ko sang-paron mein

baja ki tujh ko hai shauq-e-shanawari lekin

hai farq jhil nadi bahr ke kinaron mein

use ye KHauf ki main ba-asar na ho jaun

wo mera nam bhi leta nahin ishaaron mein

riya-pasand mizajon mein din kya 'qaisar'

nahin hai jauhar-e-iman hi din-daron mein