mujhe pahle tum ek nazar dekh lena

mujhe pahle tum ik nazar dekh lenā

jidhar chāhe jī phir udhar dekh lenā

mire jazb-e-dil kā asar dekh lenā

vo ḳhud ā.eñge mere ghar dekh lenā

shab-e-vasl tum chhoḌ kar mujh ko jaao

mazā is kā vaqt-e-sahar dekh lenā

kisī roz ye tīr-e-mizhgāñ tumhārā

karegā mire dil meñ ghar dekh lenā

tumheñ fitna-e-hashr kahtī hai duniyā

koī tum se uTThegā shar dekh lenā

mujhe roz dar par jo dekhā to bole

ġhazab hai tumhārā abhī ghar dekh lenā

tumheñ qadr 'mahmūd' kī kuchh na aa.ī

milegā na aisā bashar dekh lenā

mujhe pahle tum ek nazar dekh lena

jidhar chahe ji phir udhar dekh lena

mere jazb-e-dil ka asar dekh lena

wo KHud aaenge mere ghar dekh lena

shab-e-wasl tum chhoD kar mujh ko jao

maza is ka waqt-e-sahar dekh lena

kisi roz ye tir-e-mizhgan tumhaara

karega mere dil mein ghar dekh lena

tumhein fitna-e-hashr kahti hai duniya

koi tum se uTThega shar dekh lena

mujhe roz dar par jo dekha to bole

ghazab hai tumhaara abhi ghar dekh lena

tumhein qadr 'mahmud' ki kuchh na aai

milega na aisa bashar dekh lena