mujhe tha naz ek dil par hua nazr-e-junun wo bhi

mujhe thā naaz ik dil par huā nazr-e-junūñ vo bhī

junūñ kaisā ki husn-e-yār kā thā ik fusūñ vo bhī

mohabbat ko junūñ to ham bhī kahte haiñ magar phir bhī

jise kahte haiñ sab tark-e-mohabbat hai junūñ vo bhī

mohabbat ek sho.ala jis meñ garmī bhī ujālā bhī

jise samjhā thā sāz-e-ishq hai soz-e-darūñ vo bhī

agar jannat faqat āsūdgī kām-o-dahan kī hai

to phir kyoñ merī nazroñ meñ na ho duniyā-e-dūñ vo bhī

tumhārī nazr ke qābil agar kuchh thā to dil merā

magar hai panja-e-ālām meñ said-e-zabūñ vo bhī

rahe duniyā ke tālib tark-e-duniyā kar ke bhī dekhā

tamannāoñ kā ḳhuuñ ye bhī tamannāoñ kā ḳhuuñ vo bhī

dayār-e-ishq meñ ham ḳhāksār achchhe rahe 'jāved'

jo sarkash the yahāñ paa.e ga.e haiñ sar-nigūñ vo bhī

mujhe tha naz ek dil par hua nazr-e-junun wo bhi

junun kaisa ki husn-e-yar ka tha ek fusun wo bhi

mohabbat ko junun to hum bhi kahte hain magar phir bhi

jise kahte hain sab tark-e-mohabbat hai junun wo bhi

mohabbat ek shoala jis mein garmi bhi ujala bhi

jise samjha tha saz-e-ishq hai soz-e-darun wo bhi

agar jannat faqat aasudgi kaam-o-dahan ki hai

to phir kyon meri nazron mein na ho duniya-e-dun wo bhi

tumhaari nazr ke qabil agar kuchh tha to dil mera

magar hai panja-e-alam mein said-e-zabun wo bhi

rahe duniya ke talib tark-e-duniya kar ke bhi dekha

tamannaon ka KHun ye bhi tamannaon ka KHun wo bhi

dayar-e-ishq mein hum KHaksar achchhe rahe 'jawed'

jo sarkash the yahan pae gae hain sar-nigun wo bhi