mujhe to ranj qaba-ha-e-tar-tar ka hai

mujhe to rañj qabā-hā-e-tār-tār kā hai

ḳhizāñ se baḌh ke guloñ par sitam bahār kā hai

jab aa.e hosh na thā kis nagar se aa.e haiñ

chale to ilm nahīñ qasd kis dayār kā hai

bayāñ yahī sar-e-mimbar kareñge phir nukta

hamāre vāste jis par ye hukm daar kā hai

har ek zarre ko hai āftāb kī taufīq

har ek buuñd meñ imkān ābshār kā hai

agar nasha hai to saaqī kī mast āñkhoñ meñ

agar maza hai to mahbūb ke kanār kā hai

hamāre ishq kī sanjīdgī pe tanz na kar

hameñ ḳhabar hai magar mas.ala vaqār kā hai

nashāt-e-vasl ke lamhāt ḳhuub the 'shaukat'

firāq meñ bhī maza ḳhaas intizār kā hai

mujhe to ranj qaba-ha-e-tar-tar ka hai

KHizan se baDh ke gulon par sitam bahaar ka hai

jab aae hosh na tha kis nagar se aae hain

chale to ilm nahin qasd kis dayar ka hai

bayan yahi sar-e-mimbar karenge phir nukta

hamare waste jis par ye hukm dar ka hai

har ek zarre ko hai aaftab ki taufiq

har ek bund mein imkan aabshaar ka hai

agar nasha hai to saqi ki mast aankhon mein

agar maza hai to mahbub ke kanar ka hai

hamare ishq ki sanjidgi pe tanz na kar

hamein KHabar hai magar masala waqar ka hai

nashat-e-wasl ke lamhat KHub the 'shaukat'

firaq mein bhi maza KHas intizar ka hai