mujhe yaad hai wo mausam wo KHizan bahaar karna

mujhe yaad hai vo mausam vo ḳhizāñ bahār karnā

vo mohabbatoñ kī bāteñ vahī dil shikār karnā

vahī dhuup meñ nahānā tirī ik jhalak kī ḳhātir

bharī dopahar meñ chhat par tirā intizār karnā

tirā fāsle se milnā vo nazar bachā bachā kar

tujhe chheḌnā satānā tujhe sharmsār karnā

mire lams kī mahak meñ base pahle pahle ḳhat ko

tirā be-panāh āñkhoñ se lagā ke pyaar karnā

vahī niiñd meñ saraknā vahī ḳhvāb meñ bahaknā

vahī be-sukūn rāteñ vahī be-qarār karnā

tirā mujh se ruuTh jaanā vo zarā sī dil-lagī par

vo shikāyateñ musalsal yuñhī be-shumār karnā

mujhe yaad hai wo mausam wo KHizan bahaar karna

wo mohabbaton ki baaten wahi dil shikar karna

wahi dhup mein nahana teri ek jhalak ki KHatir

bhari dopahar mein chhat par tera intizar karna

tera fasle se milna wo nazar bacha bacha kar

tujhe chheDna satana tujhe sharmsar karna

mere lams ki mahak mein base pahle pahle KHat ko

tera be-panah aankhon se laga ke pyar karna

wahi nind mein sarakna wahi KHwab mein bahakna

wahi be-sukun raaten wahi be-qarar karna

tera mujh se ruTh jaana wo zara si dil-lagi par

wo shikayaten musalsal yunhi be-shumar karna