mujhe yaqin hai koi rasta to niklega

mujhe yaqīñ hai koī rāsta to niklegā

agar jo kuchh nahīñ niklā ḳhudā to niklegā

maiñ reg-zāroñ meñ dariyā talāsh kartā huuñ

mirī talāsh se ik silsila to niklegā

kitāb-e-zīst ke panne palaT rahā huuñ maiñ

kisī varaq se koī falsafa to niklegā

diye dikhāte raho din meñ aise sūraj ko

jo us ke dil meñ añdherā huā to niklegā

ye soch kar ke chaman meñ lagā dī aag us ne

ke is meñ koī parinda huā to niklegā

sadā.eñ denā mirā kaam hai karūñgā maiñ

koī pahāḌ mirā ham-navā to niklegā

maiñ saare shahr ko ḳhvābīda chhoḌ kar niklā

ke aañkh khulne pe ik rahnumā to niklegā

chalo bhī 'shams' uTho jugnuoñ kī mahfil se

tumhāre baa'd koī mudda'ā to niklegā

mujhe yaqin hai koi rasta to niklega

agar jo kuchh nahin nikla KHuda to niklega

main reg-zaron mein dariya talash karta hun

meri talash se ek silsila to niklega

kitab-e-zist ke panne palaT raha hun main

kisi waraq se koi falsafa to niklega

diye dikhate raho din mein aise suraj ko

jo us ke dil mein andhera hua to niklega

ye soch kar ke chaman mein laga di aag us ne

ke is mein koi parinda hua to niklega

sadaen dena mera kaam hai karunga main

koi pahaD mera ham-nawa to niklega

main sare shahr ko KHwabida chhoD kar nikla

ke aankh khulne pe ek rahnuma to niklega

chalo bhi 'shams' uTho jugnuon ki mahfil se

tumhaare ba'd koi mudda'a to niklega