mujhe yaqin ki surat wo dastyab nahin

mujhe yaqīn kī sūrat vo dastyāb nahīñ

gumāñ pe sabr bhī yuuñ hai ki iztirāb nahīñ

sarāb-e-dasht-e-junūñ aable kasak dil kī

mirā nasīb haiñ sab merā intiḳhāb nahīñ

hamārā 'ishq mizājan junūn-parvar hai

yahāñ na DhūñD hamārā yahāñ javāb nahīñ

jo ḳhvāb ban ke utartā nahīñ hai āñkhoñ meñ

vahī to merī haqīqat hai merā ḳhvāb nahīñ

kashīd kar le jo āñkhoñ se shabnamī qatre

tire laboñ pe vo khiltā huā gulāb nahīñ

vo aañkh bhar ke mujhe dekhne pe maa.il hai

kahāñ chhupūñ koī parda koī hijāb nahīñ

'ajab hai nāma-e-ulfat 'ajab haiñ tahrīreñ

payām-e-'maḳhfī' bhī hai aur intisāb nahīñ

mujhe yaqin ki surat wo dastyab nahin

guman pe sabr bhi yun hai ki iztirab nahin

sarab-e-dasht-e-junun aable kasak dil ki

mera nasib hain sab mera intiKHab nahin

hamara 'ishq mizajan junun-parwar hai

yahan na DhunD hamara yahan jawab nahin

jo KHwab ban ke utarta nahin hai aankhon mein

wahi to meri haqiqat hai mera KHwab nahin

kashid kar le jo aankhon se shabnami qatre

tere labon pe wo khilta hua gulab nahin

wo aankh bhar ke mujhe dekhne pe mail hai

kahan chhupun koi parda koi hijab nahin

'ajab hai nama-e-ulfat 'ajab hain tahriren

payam-e-'maKHfi' bhi hai aur intisab nahin