mujhi mein jita hai suraj tamam hone tak

mujhī meñ jiitā hai sūraj tamām hone tak

maiñ apne jism meñ aatā huuñ shaam hone tak

ḳhabar milī hai mujhe aaj apne hone kī

kahīñ ye jhuuT na ho jaa.e aam hone tak

kahāñ ye jur.at-e-iz.hār thī kisī shai meñ

sukūt-e-shab se mire ham-kalām hone tak

ye puḳhtagī thī ġhamoñ meñ na dhaḌkanoñ meñ sabāt

tumhāre dard kā dil meñ qayām hone tak

ye chāñd taare mirī dastaras se duur nahīñ

ki fāsle haiñ mire tez-gām hone tak

guzar rahe haiñ nazar se nazar milā.e baġhair

Thahar bhī jā.iye ek ek jaam hone tak

diye bujhā diye jaate haiñ sub.h tak 'āzim'

mirā havāla diyā us ne naam hone tak

mujhi mein jita hai suraj tamam hone tak

main apne jism mein aata hun sham hone tak

KHabar mili hai mujhe aaj apne hone ki

kahin ye jhuT na ho jae aam hone tak

kahan ye jurat-e-izhaar thi kisi shai mein

sukut-e-shab se mere ham-kalam hone tak

ye puKHtagi thi ghamon mein na dhaDkanon mein sabaat

tumhaare dard ka dil mein qayam hone tak

ye chand tare meri dastaras se dur nahin

ki fasle hain mere tez-gam hone tak

guzar rahe hain nazar se nazar milae baghair

Thahar bhi jaiye ek ek jam hone tak

diye bujha diye jate hain subh tak 'azim'

mera hawala diya us ne nam hone tak